كلشي غلا حتى الدم رخاص
وولى عادي تقطع صلة الارحام
واش للي قطعها يديه النعاس
ولا غير انا للي عايش في الاوهام
ومن حر الكية نبات نقاسي عساس
نفكر في هاذ الزمان وديك الايام
ياالغافل فيق قبل ما يشيب الراس
ويفوت الفوت وما بقى ينفع ملام
باراكا من الجفا راه فات القياس
لا تعفر لا يغيرك مظهر او اللباس
لا تخلي الحسد يگدي وفيك خدام
الناس كاملة بحال بحال مساوية ريام
كولني وراعي ولا اطحني بين الضراس
واضرب وقيس راني بحالك لحم وعظام
وشحال گدك تبقى قاطع الهضرة والكلام
قطع الأرحام ارض ما تنبت فيها اغراس
ارضو شاحفة ناشفة علّى الدوام
ارجع لله ويكون عندك احساس
يا راميني في بحر الجفا وانا ماشي عوام
ما خصرنا هضرة ما حكينا نحاس
الدنيا غادية يا الغافل تطوي في العوام
للي عندي گلت وخويت الگلب والراس
علاش نخبي ونخلي الهموم عرام
لا بغات تجي تجيبها سبيبة بلا قرطاس
والى بغات تمسي تقطع السلاسل بلا حكام
يا المشموت الوقت زربانة وانت راكبك الوسواس
ما تسنى حد وعلاش تقطع الارحام؟
نجات بوريشة
ليست هناك تعليقات:
إرسال تعليق